感人经历（二）

　　(3)
　　嗰晚我又HI大咗.我东歪西倒咁行向后门.一开门我就见到华仔又攞住部电话喺度倾电话.我本来想缩番入去.但係佢已经见到我...
　　＂听日先打番俾你.我条女来咗.＂佢一边向我行过来一边对住部电话讲.之后就CUP咗电话.
　　＂你做咩俾个假电话野?搞到我揾都揾你唔到!＂佢过来揽住我.语气有小小嬲.但係表情又好似好开心.
　　＂我边有啊?你自己记错电话咋呱.＂我真係好意外.佢居然仲话我係佢条女,或者佢仲想食呢份未食过嘅消夜.
　　＂唔係13XXX6XXXXX咩?＂佢居然背得出我个电话.虽然错咗一个号码.
　　＂13XXX9XXXXX啊..都话你自己记错噶啦!＂可能佢有过眼不忘嘅本事啦.我实在揾唔到理由去相信佢会用心去记我个电话.因为我个号码11位数9个数字.连我自己都用咗好耐时间去记.
　　＂可能我嗰日将9按成6啦.唔怪得啦.打过去次次都係空号.我以为你玩我添啊.＂佢摸住我块面.又锡咗一淡.好温柔.好温柔.
　　之后我又同佢上咗去佢间房玩.但係今次班人几乎都识得.其中一个就係平.我成个人傻咗.我喺呢间场玩咁耐从来都无见过佢.但係今晚居然俾我喺度撞见佢.
　　＂呢个我小学同学啊.叫阿平.＂华仔坐喺平隔离.我坐华仔隔离.佢介绍平.＂呢个我条女.＂
　　＂HI...＂平先同我打招呼.我点咗下头无讲嘢.或者佢唔想俾华仔知我同佢D 嘢啦.但喺成间房得华仔一个唔知...
　　我成晚都坐喺华仔隔离.华仔成晚都揽住我.佢同我讲好多嘢.我都无心装载.我时不时会偷偷望下平.佢瘦咗.染咗头发.半年无见.佢好似无咩变到.但係或者佢会好惊讶.以前嗰个甘乖嘅我会变成咁...
　　又收皮啦.佢真係车咗我去开房.睇来佢真係同嗰D人无咩分别...
　　一切同我想象中嘅一样.我哋发生咗关系.可能太过累.一阵间我就训着咗.到我训醒已经係傍晚六点几钟.我隔离嗰半张床空咗.一切都同以前一样.每次同D男仔做完第二日都会得我自己一个番去.今次都唔例外.
　　但係我摸咗下隔离.有余温.可能佢岩岩走啦.我坐起身去厕所刷完牙出来见先发现台度有个礼物盒.我走过去拆开来睇下.係一条白金手链.我喺度谂或者係佢要买来送俾人哋走嗰阵唔记得攞啦.就喺呢个时候个门开咗.我见到佢抽住两袋M记行入来.我嗰阵有种好奇怪嘅感觉.连我自己都讲唔出...
　　＂你醒咗啦?我头先去咗买嘢俾你食啊.怕你醒咗之后肚仔饿.＂佢行过来将D嘢放喺床头柜度...
　　＂噢..＂我应得好冷淡.但係其实我个心好暖.好暖.佢係第一个同我讲呢D嘢嘅男仔.
　　＂我对你咁好你唔奖励下我噶?＂佢笑住走过来揽住我.笑得好奸.
　　＂你想我点奖励你啊?＂我突然间有种好幸福嘅感觉.虽然我知道只係过眼云烟.
　　＂我想..我想...我想....＂佢个头越靠越埋.＂我想你锡我一淡咯.次次都係我主动锡你.＂
　　我松咗口气.本来我以为佢会话想嗰味嘢.但喺我真係无谂到一个大我四岁嘅男仔会有咁细路仔咁可爱嘅一面.
　　我锡咗佢一淡之后佢走过台度攞起个礼物盒递俾我.＂送俾你噶!睇下钟唔钟意.我今日趁你训着嗰阵落去买噶!＂
　　＂多谢.我好钟意.＂我依然面无表情.但係我真係好开心.好感动.我开始奢想佢对我对我係认真嘅.佢走过来帮我戴好条手链.又喺我块面度锡咗淡.
　　食完嘢过咗一阵佢就送咗我番去.佢话今晚有嘢做.我未入到屋就有F打电话叫我出去玩.我哋又落咗嗰间场.今晚同我哋出来嗰班仔我全部都识嘅.玩咗一阵.有个叫飞嘅男仔过来揽住我.我知道佢有条女.佢哋行咗三年有多.但係佢成日都出来媾女.呢D连佢自己条女都好清楚.当然.我都无必要拒绝啦.
　　之后我好唔舒服.想呕.飞扶我出去买水饮.我哋一出到门口就见到华.佢都见到我哋.佢走咗埋来.扯开我.捉得我只手好痛.佢成个样青筋都出埋来.好嬲...
　　＂你咁算点啊?电话又唔开机.仲喺度媾仔.你当我死噶?我一做完嘢就揾你.你咁棱样对我?＂佢越讲越激动.越捉越紧.连我HI到傻更更都觉得痛.
　　＂我电话无电.＂我推开飞.唔敢抬头.但係我好唔明白佢点解咁嬲.唔通佢真係当我係佢条女?
　　＂无电就可以媾仔啊?你讲啊.＂佢讲得好大声.好恶.吓走咗飞.亦都搞到个个都望住我哋.
　　＂SORRY..＂我唔知点解佢越嬲我个心就越甜.或者我真係渴望被重视啦.
　　＂SORRY?一句SORRY就算啊?我同你讲啊.下次再见到你媾仔你就死俾我睇.我唔打你都打死D七头.＂华虽然好大声.但係佢咁讲其实都已经原谅咗我.
　　嗰日之后.佢日日都同我一齐.但係佢就一直都无带我番佢屋企.虽然我有时会唔开心.但係我一直都无开口问佢......
　　不知不觉我哋行咗个几月.嗰个几月中我哋都好开心.过得好快乐.终于.华自己开口话过年带我番去佢屋企.
　　(4)
　　转眼间就过年啦.年三十嗰晚我哋喺酒店一训醒佢就车我番去佢屋企.佢屋企好冷清.得佢妈一个喺度等我哋番去.佢无兄弟姐妹佢讲过.但係佢从来都无讲起过佢爸.我谂佢爸可能过咗身.又或者同佢妈离咗婚啦...
　　未食得饭.我同佢喺厅度坐.可能我已经爱上佢啦.所以我好想知道关于佢嘅任何嘢.
　　＂咦...唔见你老豆嘅?＂我用试探嘅口吻问佢.
　　＂我无老豆噶.你唔好再提呢两个字.＂佢好火.自从上次同飞锅嘢之后佢都未试过大声同我讲嘢.但係佢今次咁大声同我讲嘢.我个心好唔舒服.
　　＂SORRY..我无心噶.＂佢好似睇得出我唔开心.＂佢同我妈离婚好耐啦.你唔好再提起佢啦.我哋都当无咗呢个人噶啦.＂
　　＂嗯...＂本来我都只係小小唔开心,但係佢越係温柔我就越觉得委屈.
　　＂锡锡啦..唔好咁啦.我妈见到会唔中意噶.＂佢揽实我.锡我块面度乱锡.
　　一边食饭佢妈就一边起我底.我都有句答句.之后佢问我咁细个做咩唔读书.我无答.唔出声.就话我食饱啦...之后就行咗入佢间房.
　　佢跟住我行咗入来.＂我妈係咁噶啦.你唔好摆喺心度啦.＂
　　＂我无嘢啊.你出去食饭啦.＂我笑得好假.虽然呢个问题无咩.但係我真係唔知点答.
　　＂走咯.我哋出街食啊.＂你拉起我行出门口.
　　＂无咩事唔好带佢番来啊.＂我哋行到门口佢妈就用好严肃嘅语气讲咗呢句嘢.
　　佢无出声.大大力咁关上门.但係我块面已经变咗苦瓜.佢一路咁氹我.氹咗好耐.终于到咗晚上11点几.佢车咗我去广场倒数.喺人群中.佢捉住我只好.好紧.好紧.好似话我知点都唔会放开我.
　　嗰晚我哋又出咗去玩.玩到第二日先番去.佢又车咗我去佢屋企.我唔肯行入去.佢就同我讲.佢要用行动话俾佢妈知佢认定我.
　　但係佢妈都好难应付.日日都用D好婉转嘅说话来话我知佢唔钟意我...