TVB综艺节目《大整蛊》播到尾声啦,下星期一同样时段将会播出新节目《好声好戏》,作为曾志伟王祖蓝空降做高层后嘅九大综艺节目,呢个配音比赛真人骚搵嚟唔少旧人回巢,除咗有刘江担任导师,呢日有人喺预告中发现「傻姑」陈安莹踪影﹗佢接受访问时话:「係呀我有份参赛。」  刘江回巢TVB,同汪明荃一齐担任《好声好戏》导师。(影片截图) 预告片出街后有列出12名参赛者,包括冯盈盈、张振朗、陈自瑶、黄翠如等,赫然发现「陈安莹」名字,讨论区有人发文,问係咪同名同姓演员,事关陈安莹早已是专业配音员,足够资格做导师而非参赛者。陈安莹1979年第8期入选无綫电视艺员训练班,毕业后曾三度饰演金庸小说笔下嘅儍姑一角。2012年王维基挖角下,离开工作33年嘅TVB。  《好声好戏》预告片有参赛者名单,发现「傻姑」陈安莹踪影。(影片截图) 陈安莹接受访问时话:「其实好多朋友知我参加都O晒咀。当日係王祖蓝打嚟邀请,当时佢话自己返去搞嘅第一个节目,关于配音比赛想我参加,不过就唔係导师而係参赛者,我谂当下佢都有少少怕我介意但其实真係无。因为大家一直都知我係个演员,但其实都做咗配音员好多年,内地有《声临其境》但香港真係未试过有同类讲配音嘅节目,可以推动下配音呢一行,畀大家知唔止演员难,配音都需要专业训练,所以我决定参加。」 陈安莹参加配音节目真人秀《好声好戏》。(影片截图) 相隔9年再返TVB电视城,陈安莹话一切都好熟悉,见返好多朋友:「除咗其他参赛者基本上台前幕后都识。前后拍摄三日已经完成工作,其实我屋企无电视又无特别上网睇,有人问我预告喊乜我真係唔知係边幕。记得拍摄时我喊左2次,配音时有喊讲嘢时都有喊,有一个位係面对LISA姐,以前我成日同佢做主僕,嗰刻谂起以前好多合作点滴,我同佢讲LISA姐你知我演戏时係点,依家终于知埋我配音时係点样。」 陈安莹三度饰演傻姑。