太折腾人啦，啊啊啊啊啊啊啊啊啊啊啊啊啊啊啊

　　一系列嘅事，我觉得应该系由8号早上讲起。话说8号早上8点几，宝贝猪起床话可能感冒发烧，个头比较痛，于是摸摸佢额头，好似真系有D烧咁样，就谂住一阵等钰羲醒左先，跟住同宝贝猪去睇医生。
　　呢个时候，钰羲都醒左，仲系度笑，跟住我就嘘佢屙左一督大尿（佢日日训醒个督尿都好大架，哈哈），跟住就等佢自己爬下先，咁我谂住去刷牙洗面。点知钰羲爬下爬下，突然间跌低左跟住系度喊，咁我米扶起佢，等佢继续爬（平时有时都系咁），点知无一分钟，佢又跌低左，仲好似起唔到身咁，系度喊。我即刻抱佢起身，点知发现佢全身好热啊，我心谂，唔通钰羲又发烧。睇落就似啦，佢全身都好似无晒力咁。呢个时候，佢开始震，无错，系全身开始震。咁我米以为佢好冻罗，于是放翻佢落床，跟住帮佢盖住张被。点知佢开始抽搐，我好惊啊，宝贝猪个时见到都好惊，我地两个不断咁叫钰羲个名，但系佢一直系度抽搐，仲反白眼。我急到就来喊啦，又唔知点做，如果呢个时候抱起佢又唔知会唔会令佢更加辛苦。过佐差唔多1分钟，抽搐完左，我即刻抱起钰羲，叫佢，佢好似好辛苦咁嗯嗯嗯咁叫，一面叫一面系我怀里面训着左。
　　宝贝猪叫我即刻换衫，带钰羲去睇医生。我个时真系六神无主晒，完全好似想着睡衣咩都唔带抱住佢去睇。我地好速度咁换左衫，罗左D野，就去左最近嘅百花园诊所。
　　去到，我好心急咁同医生讲左钰羲嘅基本情况，跟住医生一摸，就话钰羲发高烧，然后帮钰羲探热。医生话，有D细路仔发高烧系会抽搐嘅，并唔系其他咩病，叫我地放心。唉，我真系未见过嘛，我点知喔，唔担心就奇啦。钰羲烧到39 ，后来打左退烧针，明显佢成个人都精神晒。跟住我又比左好多水佢饮，过佐无几耐，过佐无几耐，佢就退左烧啦。
　　宝贝猪都顺便系个度睇左医生，开左感冒药。我叫宝贝猪翻屋企先，因为BB抵抗力差，怕交叉传染，我就同钰羲翻铺头。
　　翻到铺头，钰羲就系床个度爬来爬去啦，又恢复翻平时嘅活泼状态。我以为佢就系咁样无事啦。点知到佐第二日，即系9号早上，钰羲又开始发烧。8号个晚训觉已经好注意架啦，又成日帮佢抹汗，但系9号早上都系反复。无办法，唯有带佢去保健院睇，要吊针。钰羲第一次吊针，真系喊得好犀利啊，我睇到都心痛，自己都想喊埋一份。佢今次系吊头仔，吊到下午3点几先吊完，个时退左烧。
　　然后继续活泼状。（呢两日因为钰羲发烧，我地成日都会留意住佢嘅体温，又用水银温度计帮佢量体温。）点知到佐晚上7点几，又开始反复，烧到38 5。无办法，都要带佢去睇医生架啦，一阵如果三更半夜佢唔舒服仲麻烦。于是我同宝贝猪同我妈妈一齐带钰羲过一院睇儿科急诊。又系吊针，个晚吊到12点几。退左烧。
　　10号早上，首先摸摸钰羲个头仔手仔，发现无发烧，我都唔放心，再量下佢体温，先确定佢真系已经退左烧啦。点知11号个晚，钰羲又开始咳，流鼻鼻，鼻塞。于是第二日就同我妈妈带佢去一院睇呼吸专科。同样地都系要吊针（呢几日真系好折腾，特别系钰羲），连续两日针。到佐13号，钰羲终于好翻啦。我都终于放下心头大石啦。
　　轮到我，唔知点解，我个晚就开始觉得喉咙好唔舒服。但系我无理，我谂住饮多D水应该会无事架啦。点知第二日训醒我都开始咳嗽啦，个头又痛。我心谂，唔系嘛，一家人轮住来病咩。
　　到佐今日，我感冒都未好，琴晚头痛尤为严重，训得超唔好。今早去一院睇左中医，开左3日中药，希望今次真系可以好翻啦。