广州的别称（广州的雅称是什么城啊）

　　广州的别称（广州的雅称是什么城啊）
　　今日先问大家一个严肃嘅问题，作为一个广州人，你知唔知广州建城系边一年？
　　虽然广州市仅有96岁，而广州建城至今足足有2000几年历史，咁几千年嚟，＂广州＂究竟有过咩名？
　　最初喺先秦时期，南越、骆越、瓯越等土著族群生活喺岭南境内，合称＂百越＂。此时嘅广州尚未建城，成个广州地区被称为＂南越＂、＂百粤＂。
　　广州最早嘅名：楚庭
　　＂楚庭＂，传说中系广州最早嘅名。
　　＂楚庭＂一名，令人觉得岭南地区曾经被楚国统治，所以有呢个名。但经过考证，岭南地区并唔喺楚国疆域之中，而楚人并未直接统治过岭南。
　　故＂楚庭＂嘅由来，一种理解系百越子民臣服于楚嘅象征，另一种系楚国人与百越族来往甚密，楚国设置楚庭以纪念两地之间嘅友谊。
　　▲越秀公园中山纪念碑下，有一个清朝所建嘅石牌坊，背面刻住＂古之楚亭＂四字。广州最出名嘅名：羊城
　　＂羊城＂可以话系广州最具代表性嘅别名，「羊城」、「五羊城」、「穗城」均来源于五羊传说，传说故事已经广为大众所知，就唔再累述。
　　广州最出人意料嘅名：番禺城
　　虽然如今嘅番禺只系广州一个行政区，但系相当长一段时间，＂番禺＂曾经系广州嘅市名。
　　＂番禺＂二字，战国时期已经存在，佢嘅缘由众说纷纭，其中为大部分人接受认同嘅系，番禺源自于番山、禺山两座山。
　　秦始皇平定岭南后，岭南地区被设置为南海郡、象郡和桂林郡。
　　此时嘅南海郡相当于今广东省大部分地区，并非今日佛山嘅南海区，南海郡郡治于番禺县（即广州）。
　　喺广州古名之中，＂番禺城＂系有最可靠并最有迹可证嘅名称。
　　▲番禺城位于今广州仓边路以西,今吉祥路及教育路以东广州以人命名：任嚣城、赵佗城、步骘城
　　广州曾经以历史人物命名，有啲并非系正式嘅名称，更多系流传于民众之口。
　　任嚣城、赵佗城分别取自于秦始皇麾下嘅两位将领之名。
　　秦始皇派出嘅平定岭南嘅军队，以任嚣为主帅，赵佗为副帅，任嚣征战有功，被委任为南海郡尉，扎根岭南，兴土修筑番禺城，被称为＂任嚣城＂。
　　▲任嚣
　　＂任嚣城＂系广州历史上第一座城池，奠定咗广州建城起点，故史学家将＂任嚣城＂建立嘅公元前214年，定为广州建城之始。
　　任嚣病重，赵佗继任南海郡尉，继续筑城扩墙，＂任嚣城＂易主，名称自然就变为＂赵佗城＂。
　　而步骘城，就系源自于东吴嘅一位臣子——步骘（诸葛亮舌战群儒仲第三位提出刁难问题者）。
　　汉武帝灭南越之后，广州就如同被打入冷宫，一Down就Down几百年，直到有位贵人出现，阿个人就系步骘。
　　步骘被孙权委派任职交州刺史（交州为今日两广大部分地区），任职期间发现番禺县地大物博，人杰地灵，但系被人闲置。
　　步骘马上上书孙权，重修番禺城，振兴呢个南越古城，广州得以重生，民间为感谢步骘，会将广州称为＂步骘城＂。广州最辉煌嘅名：越王城、南越城
　　上边讲到，赵佗出任南海郡嘅＂地方行政长官＂，但系赵佗唔甘心剩系做个地方小官，佢决定玩铺大嘅，结果就开咗一个国家——南越国。
　　秦亡之际，赵佗攻并桂林、象郡，建立南越国，自称＂南越武王＂，我哋嘅广州从一个城市，一跃为南越国国都，民间得名＂越王城＂＂南越城＂，但系正规史料上并冇呢两个名。
　　南越国存在93年，历经五代君主，一直到公元前111年汉武帝灭南越，之后广州就一直蛰伏，直到步骘出现。
　　▲南越国宫署遗址
　　百年南越国，系岭南文明最重要嘅奠基期，亦都系广州作为一国之都嘅辉煌时期。
　　▲如今解放北路嘅西汉南越王博物馆，就系依托南越国第二任君主赵眛（赵佗之孙）嘅陵墓所建广州最终得名：广州
　　终于要讲到＂广州＂呢个名嘅由来啦。
　　三国吴黄武五年，孙权下令将原来嘅交州分拆为交、广二州，广州州治设于番禺县，＂广州＂之名由此而起。
　　此时嘅广州，疆土面积要比依家要大好多，而番禺县都唔系今日嘅＂番禺＂。
　　以上就系广州几大重要嘅古名，除咗呢啲之外，广州仲有啲古名，使用时间唔长或者存在疑点，就唔详细介绍，只作科普。南武城
　　根据《广东通志·舆地志》记载，＂广州城始筑自越人公师隅，号曰南武＂，即广州最早嘅筑城者系越人公师隅，所筑城池叫南武城。
　　（另有记载话，南武城嘅筑城者其实系一位叫＂高固＂嘅楚相。）番州
　　公元601年，为避隋炀帝杨广名讳，广州短暂改名为＂番州＂，后来又恢复原称。兴王府
　　五代十国时期，刘岩建立南汉国，设置兴王府（即系广州）为国都，呢次系广州第二次作为一国之都。
　　不过南汉国就存活在唔系好耐，五十几年就畀宋军KO。
　　科普：广州历史上三次作为国都，分别系南越（前203年-前111年）、南汉（917年-971年）、南明（只存在咗几十日），史称＂三南＂。
　　唔知上述嘅广州古名，你最中意系边个？
　　素材出自《广州别称史源》、《广州建城史》
　　羊城网负责整理编辑